Kreu i Partisë Demokratike, Sali Berisha, zhvilloi këtë të hënë një tjetër Foltore përpara godinës së Kryeministrisë, ku akuzoi ashpër qeverinë dhe kryeministrin Edi Rama për atë që e cilësoi si “krizë të paimagjinueshme korruptive”.

Në fjalën e tij, Berisha u ndal tek hetimet ndaj zv.kryeministres së pezulluar, Belinda Balluku, e cila po përballet me akuza për një aferë të dyshuar prej 50 milionë eurosh. Sipas tij, dokumentet që kanë dalë në dritë e kanë ekspozuar “lakuriq” edhe kryeministrin Rama.

“U desh akuza ndaj zv.kryeministres për të bërë që Edi Rama të deklarojë vetë se hajduti jam unë dhe drejtësisë i tregoj bërrylin,” u shpreh Berisha, duke e cilësuar këtë si aktin më skandaloz që mund të bëjë një udhëheqës politik në një vend demokratik.

Sipas tij, një kryeministër në kushte normale “do kishte vetëm një rrugë: largimin e menjëhershëm”, por Rama nuk e bën sepse “paratë i ka marrë vetë” dhe “i kanë ndarë bashkë”.

Berisha deklaroi se këto 10 vitet e fundit vendi është zhytur në krizë, duke u kthyer “100 vite prapa”, ndërsa akuzoi qeverinë për varfërim masiv dhe shpërdorim të fondeve publike.

“Me Ramën nuk hyjmë më në zgjedhje”

Një tjetër tezë që Berisha riktheu në skenë ishte refuzimi për të marrë pjesë në zgjedhje me Ramën kryeministër.

“Me Edi Ramën nuk shkojmë më kurrë në zgjedhje. Zgjedhjet nuk ia falim kurrë,” deklaroi ai, duke theksuar se beteja politike do të vazhdojë çdo të hënë para Kryeministrisë.

Berisha akuzoi qeverinë se “qeveris me drogën”, dhe se parlamenti është shndërruar në instrument të mazhorancës, ndërsa drejtësia — sipas tij — është e përdorur politikisht.

Ai kërkoi vijimin e protestave dhe mobilizimin e qytetarëve:
“Sheshin nuk e lëshojmë. Kemi hyrë në betejë vendimtare. Fitorja është e jona. Liritë tuaja do triumfojnë përsëri.”

Thirrja për protestën e radhës

Berisha njoftoi se javën e ardhshme Foltorja do të zhvillohet sërish në të njëjtin vend, duke paralajmëruar një sezon të ri protestash kundër qeverisë.

“Të hënën tjetër, përsëri këtu. Në çdo të hënë do ta nisim javën me betejë kundër kryehajdutit të kombit,” përfundoi ai.