Kreu i Partisë Demokratike Sali Berisha, i zgjedhur pas procesit të organizuar nga Rithemelimi, ka mbajtur një fjalim me tone të forta në mbledhjen e sotme të Këshillit Kombëtar.

Berisha tha se anëtarët e PD-së janë gati që të bëjnë beteja për rrëzimin e regjimit, dhe drejtuesit e kësaj force politike duhet të kenë qëllim kryesor që ti udhëheqin ata drejt këtyre betejave.

“Protagonizmi, të kënaqurit me karrigen, është sëmundja e dytë e opozitës, ne kemi një post, dhe nuk bëjmë asgjë. Për të mos qenë opozitë profesioniste, ka vetëm një antidot, një pyetje që duhet ti shtrojmë vetes ne të gjithë drejtuesit: Çfarë do të bëjmë ne kundër këtij regjimi, një betejë e paparë ndonjëherë është jetike për rrëzimin e këtij regjimi.

Nuk ka vend në Europë, përveç Bjellorusisë dhe Rusisë, që të drejtat e njeriut të dhunohen më shumë se kaq. Duhet të shtrojmë çdo ditë pyetje vetes, ky është qëndresa jonë, kush është qëllimi ynë? Duhet të hedhim poshtë qëndrimet apatike që ka mbajtur PD deri tani. Pse u Rithemelua PD, që kjo parti të ishte parti e interesit kombëtar, që shkelmohet çdo ditë nga Edi Rama.

A mund të imagjonohet që Tirana të shndërrohet në Beogradin dhe në Moskën e vogël, 42 mijë anëtarë të PD presin nga ne që të kundërshtojmë politikën antikombëtare të Edi Ramës, ata janë të gatshëm për beteja, ata presin vetëm udhëheqjen tuaj. Anëtarët dhe anëtaret tona ndjejnë dhimbje të madhe dhe dëshpërim të thellë, kur shohin kombin e tyre që të shpërbëhet çdo ditë, dhe të braktiset nga shqiptarët.

Pas çdo vendimi qëndron një vjedhje, qëndron një plaçkitje, ndërkohë që shqiptarët shiten në varfëri. Ti shkurtojmë ditët kësaj qeverie, pa asnjë kompleks. Është e vërtetë që ka para të pafundme krimi, është e vërtetë që komisariatet e policisë rrahin njerëz në rrugë, por ka një të vërtetë më të madhe, që ky regjim është: kalbësirë, kalbësirë, kalbësirë!”, tha Berisha në mbledhjen e Këshillit Kombëtar.