Presidenti i SHBA Joe Biden tha të martën se të gjithë të rriturit amerikanë mbi 18 vjeç e sipër mund të vaksinohen kundër COVID, që nga data 19 prill.
Njoftimi i presidentit vjen në një kohë kur vendi po përballet me valën e katërt të rritjes së infeksioneve, sidomos në radhët e të rinjve.
“S’do të ketë më rregulla konfuzuese, s’do të ketë më kufizime,” tha presidenti të martën në Shtëpinë e Bardhë duke njoftuar se që nga data 19 prill “çdo 18 vjeç e sipër përmbush kushtet për t’u vaksinuar”.
Gjatë javës së fundit, infektimet e reja kanë shënuar 7% rritje krahasuar me periudhën e mëparshme shtatë ditore. Shtrimet në spitale janë rritur 3%, ndërsa vdekjet nga COVID-19 kanë shënuar rënie të vogël duke arritur në rreth 800 viktima në ditë.
“Ne nuk jemi në vijën e finishit. Kemi akoma shumë punë për të bërë. Ne jemi akoma në një garë jete-vdekje, ”tha Biden.
Asnjë vaksinë COVID-19 ende nuk është e autorizuar për fëmijët nën 16 vjeç, megjithëse testimi është duke u zhvilluar.
Shumica e shteteve amerikane tashmë kanë thënë se do të shpërndajnë vaksinat për të gjithë të rriturit deri në atë datë të re të synuar.
