Sistemi Self-Care, i përdorur nga bizneset për fiskalizimin dhe raportimin tatimor, vijon të mbetet jashtë funksioni, duke krijuar probleme serioze për mijëra subjekte ekonomike. Siç evidentohet edhe nga përpjekjet për aksesim përmes portalit qeveritar e-Albania, shërbimet nuk janë të disponueshme.

Sipas Blerina Gjyliqit nga shoqata e biznesit të mesëm dhe të vogël, rreth 130 mijë subjekte janë prekur drejtpërdrejt nga kjo situatë, e cila po zgjat prej më shumë se një muaji.

Një nga shqetësimet kryesore lidhet me afrimin e afatit për dorëzimin e pasqyrave financiare të vitit të kaluar, që duhet të kryhet brenda muajit mars. Në kushtet kur sistemi qeveritar nuk funksionon dhe bizneset nuk kanë mundësi teknike të raportojnë të dhënat, përfaqësuesit e tyre kërkojnë nga Drejtoria e Përgjithshme e Tatimeve shtyrjen e afateve ligjore.

Po ashtu, bizneset shprehin shqetësim për vendosjen e gjobave dhe penaliteteve automatike, pasi sistemi tatimor, edhe në mungesë të mundësive teknike për deklarim, vijon të aplikojë masa ndëshkuese online.

Përballë kësaj situate, komuniteti i biznesit bën thirrje për masa urgjente dhe ndërhyrje të menjëhershme nga institucionet përgjegjëse, me qëllim rikthimin sa më shpejt të funksionalitetit të sistemit dhe shmangien e pasojave financiare të padrejta për sipërmarrësit.