Biznesmeni i njohur Kristian Boçi ka humbur shikimin në njërin sy pas një aksidenti të rëndë automobilistik pranë Lushnjes. Boçi ndau një video nga spitali me ndjekësit e tij, duke falënderuar Zotin dhe shprehur mirënjohjen që dy fëmijët e tij, të cilët ndodheshin me të në makinë, janë në gjendje të mirë shëndetësore.

Aksidenti ndodhi në afërsi të fshatit Golem, kur automjeti tip Mercedes “GLE” me targa “AA 334 RP” humbi kontrollin, dyshohet për shkak të shpejtësisë së lartë, dhe kaloi barrierat e hekurta duke përfunduar në një kanal anësor të autostradës.

Në mesazhin e tij, Boçi tha: “Zotit i qofsha falë. Vërtet kam humbur shikimin në të majtën, por gjithmonë me shpresën që do të më kthehet. Faleminderit Zotit që më ka ruajtur dy fëmijët dhe ata janë mirë. Faleminderit për çdo mesazh që kam marrë. Më falni që nuk i ktheva dot të gjitha përgjigjet. Ruajeni shëndetin, sepse është gjëja më e rëndësishme. Faleminderit të gjithë doktorëve të Spitalit Usharak që kanë bërë të pamundurën.”

Aksidenti i rëndë duket se ka lënë pasoja të rënda për shëndetin e Boçit, i cili vazhdon të trajtohet në spital me shpresën për përmirësim.