Bledi Çuçi mblodhi paraditen e kësaj të hënë Grupin Parlamentar të Partisë Socialiste.

Takimi u zhvillua para seancës plenare të planifikuar për orën 17:00. Në fjalën e tij drejtuar deputetëve, Çuçi i inkurajoi ata të shfrytëzojnë seancën e sotme për të trajtuar çështjet e evidentuara nga zgjedhësit gjatë javës së gjelbër.

Për seancën e ditës së enjte, Çuçi informoi deputetët për interpelancën me Ministren e Arsimit, si dhe për projektligjet e tjera që pritet të miratohen dhe për të cilat deputetët do duhet të angazhohen në diskutime. Mes tyre janë projektligji për Albcontrol, dekreti i presidentit për shtetësinë, projektvendimi për zgjedhjen e kryetarit dhe një anëtar të bordit të Entit Rregullator të Energjisë Elektrike etj.

Pas kësaj, mbledhja vijoi me trajtimin e çështjeve të ndryshme të ngritura nga deputetët e pranishëm, të cilat kryesisht lidheshin me probleme komunitare ose për projektligje të caktuara.