Qarkullimi i mjeteve drejt juglindjes së vendit mbetet i bllokuar për shkak të rrëshqitjes së dherave në aksin Librazhd–Prrenjas, ku një urë në vendin e quajtur “Arrat e Gurrës”, në fshatin Dragostunjë, është nxjerrë jashtë funksioni pasi rrezikon shembjen.

Kreu i Autoritetit Rrugor Shqiptar (ARRSH) e cilësoi situatën si problematike dhe bëri të ditur se ndërhyrja për krijimin e një by-pass-i mbi urën e dëmtuar nuk dha rezultat, pasi është regjistruar një tjetër fundosje dhe rrëshqitje dherash, duke e bërë zonën të pakalueshme. Për arsye sigurie janë tërhequr mjetet e firmës zbatuese dhe është ndaluar plotësisht qarkullimi i mjeteve dhe këmbësorëve.

Aktualisht po kryhet një rivlerësim urgjent gjeologjik dhe teknik, pasi terreni paraqitet i paqëndrueshëm. Specialistët po shqyrtojnë mundësinë e krijimit të një kalimi të përkohshëm vetëm për mjete të vogla dhe automjete emergjence.

ARRSH dhe Policitë e Qarqeve Elbasan e Korçë rekomandojnë përdorimin e rrugëve alternative deri në një njoftim të dytë.
Autoveturat këshillohen të ndjekin itinerarët:
• Maliq – Lozhan – Strelc – Gramsh – Elbasan
• Qafthanë – Pogradec – Korçë – Leskovik – Përmet – Tepelenë

Ndërsa mjetet e tonazhit të rëndë që vijnë nga juglindja duhet të devijojnë drejt Maqedonisë së Veriut përmes Doganës së Qafë Thanës dhe të rifuten në Shqipëri nga Dogana e Bllatës, për të vijuar më pas në rrugën e Arbrit.

Paralelisht, është ndërhyrë për zhvendosjen e një shtylle të tensionit të mesëm në linjën 110 kV Librazhd – HEC Egnatia, e cila rrezikon shembjen. Në zonë janë vendosur forca të Ushtrisë dhe efektivë të FNSH-së për të garantuar sigurinë dhe për të parandaluar çdo rrezik për qytetarët.