Boksieri shqiptar, Florian Marku, ka lënë qelinë në Gjermani, ku u arrestua disa ditë më parë për shkak të një dënimi të pakryer në Greqi. Burime për gazetarin Ernest Koçi bëjnë me dije se historia e Markut me drejtësinë lidhet me një ngjarje të ndodhur 14 vite më parë, kur ai ishte i ri dhe ishte përfshirë në një sherr në Selanik. Shteti grek tani kërkon ekstradimin e tij për të përfunduar dënimin e mbetur, që është afro gjashtë muaj.

Në datën 9 dhjetor, Marku ishte duke udhëtuar nga Anglia në drejtim të Gjermanisë, kur në hyrje të kufirit i është njoftuar një urdhër arrest nga autoritetet greke. Çështja lidhet me një ngjarje nga vitet e kaluara, kur Marku ishte arrestuar në Selanik për akuzat e plagosjes dhe armëmbajtjes pa leje, duke marrë një dënim prej 7 vitesh burg. Ai ka kryer vetëm një vit e gjysmë, dhe në përputhje me ndryshimet e fundit në ligjin grek, duhet të kryejë të paktën një të tretën e dënimit.

Marku e ka pranuar dënimin e mbetur, i cili është rreth 6 muaj burg, dhe do të presë vendimin për ekstradimin e tij nga Gjermania, pasi nuk mund të largohet deri sa drejtësia të vendosë për çështjen.