Edhe seanca e ditës së sotme pritet të shoqërohet me debate, teksa do të diskutohet skandali me ish agjentin e FBI Charles McGonigal.

Deputeti i Partisë Demokratike Enkelejd Alibeaj ka kërkuar një interpelancë me kreun e qeverisë lidhur me këtë çështje. E njëjta kërkesë është bërë nga mbështetësit e Berishës. Por, këta të fundit kanë kërkuar nga kryeparlamentarja Lindita Nikolla që debati me mocion të mos jetë me limit kohor.

Ndërkohë Berisha pasi bllokoi Foltoren seancën e kaluar është përjashtuar me 10 ditë nga punimet e Kuvendit së bashku me 4 deputetë, përkatësisht Belind Këlliçi, Flamur Noka, Edmond Spaho dhe Edi Paloka.

Vendimi për të përjashtuar deputetët, u mor në Sekretariatin për Procedurat, Votimet dhe Etikën në Kuvend.

Kërkesa për përjashtimin e deputetëve të Partisë Demokratike erdhi nga maxhoranca socialiste në lidhje me bllokimin e foltores dhe kaosin e shkaktuar gjatë seancës plenare të së enjtes.

Në dosjen hetimore ndaj ish-kreut të kundërzbulimit të FBI-së në Nju Jork, përmendet disa herë emri i Edi Ramës si dhe marrëdhëniet e dyshimta të të dyve me 2 persona me kombësi shqiptare të cilët thuhet në dosje se i kanë dhënë rreth 225 mijë dollarë Mc Conigan.

Opozita ka vënë theksin dhe tek përfshirja e Mc Conigal në disa kompani te dyshimta që operojnë në Shqipëri si dhe për përfshirje në investime në vend dhe të disa sipërmarrësve rusë, të lidhur ngushtë me Vladimir Putin.