Pas muajsh të vështirë, të shënuar nga hetime dhe një skandal që tronditi imazhin e saj publik, Chiara Ferragni ka bërë një hap të madh: është bërë aksionerja kryesore e markës së saj, “Chiara Ferragni Brand”, duke zotëruar 99% të aksioneve.
Lajmin e ndau vetë përmes një mesazhi emocional në rrjete sociale, ku falënderoi ndjekësit për mbështetjen dhe pranoi sfidat me një sinqeritet të rrallë: “Nuk dua t’ju tregoj një përrallë. Përrallat nuk ekzistojnë. Dua t’ju tregoj realitetin: të papërsosur, por timin.”
Ky zhvillim shënon një pikë kthese për influencuesen më të famshme italiane, e cila pas goditjeve nga “Pandoro Gate”, mbylljes së dyqanit në Milano dhe uljes së shitjeve, ka vendosur të rifillojë gjithçka nga zero – këtë herë pa ndërmjetës, pa menaxherë vendimmarrës dhe me më shumë përulësi.
Marrja e kontrollit të plotë të markës nuk është thjesht një veprim ekonomik, por një deklaratë e qartë: Ferragni nuk është gati të dorëzohet. Ajo është gati të rindërtojë, me më pak iluzione, por me më shumë fuqi personale.
