Drejtuesi i fushatës së Partisë Demokratike, Chris LaCivita, ka mbajtur një fjalim të fuqishëm gjatë prezantimit të programit të Aleancës për Shqipërinë Madhështore në Pallatin e Kongreseve.

Ai theksoi se 12 vitet e fundit nën drejtimin e Edi Ramës kanë qenë një dështim i plotë për Shqipërinë, duke u shprehur: “Një dështim në drejtimin e qëndrueshëm dhe një dështim për familjet shqiptare.”

Në kontrast, LaCivita lavdëroi Dr. Sali Berishën si një mik të vërtetë për shqiptarët dhe një lider me një program të qartë dhe të realizueshëm për uljen e kostos së jetesës dhe për krijimin e mundësive për rininë dhe punësim. Ai e krahasoi planin e Berishës me politikat konservatore të Ronald Reagan dhe Donald Trump, duke e cilësuar atë si një plan real për uljen e taksave dhe përmirësimin e kushteve për qytetarët.

LaCivita përmendi gjithashtu dallimin thelbësor mes një udhëheqjeje të qëndrueshme dhe konservatore, si ajo e Dr. Berishës, dhe një socialisti të paqëndrueshëm që, sipas tij, fshihet pas hijes së vet.

Përfundimisht, ai e mbylli fjalimin me një mesazh të fortë: “Një fitore për Dr. Berishën është një fitore për familjet shqiptare. Faleminderit! Fitore! Fitore!”