Që prej njoftimit të Izraelit për pushtimin e Qytetit të Gazës, ushtria izraelite ka shkatërruar ose dëmtuar mbi 1,800 ndërtesa brenda dhe përreth qytetit, sipas një analize të realizuar nga CNN mbi imazhe satelitore të Planet Labs.

Pamjet e datës 5 shtator, të krahasuara me ato të 9 gushtit – një ditë pas miratimit të ofensivës së re – tregojnë shkatërrime në shkallë të gjerë, kryesisht në ndërtesat e banimit. Zonat më të goditura janë Zeitoun, në jug të qendrës së qytetit, dhe Al-Tuffah, në lindje, ku mijëra palestinezë të zhvendosur kishin gjetur strehim.

Edhe më në veri, në Jabalya, janë rrënuar mbi 750 ndërtesa, ndërsa imazhet satelitore sugjerojnë se një pjesë e madhe e dëmeve nuk lidhet me sulme ajrore të menjëhershme, por me shembje graduale të kryera nga ushtria izraelite me ekskavatorë dhe buldozerë.

Një imazh i datës 19 gusht tregon makineritë e rënda duke shembur ndërtesa në Zeitoun. Vetëm 24 orë më pas, ato ishin zhvendosur 300 metra më thellë në lagje, duke rrëzuar edhe 26 ndërtesa të tjera. Deri më 25 gusht, në bazën e IDF-së në Zeitoun ishin të dukshme të paktën 16 ekskavatorë, duke vazhduar prishjet.

Ndërkohë, mes 5 dhe 8 shtatorit, pesë ndërtesa të larta u bombarduan. “Në total, ato përmbanin 209 apartamente, ku strehoheshin mbi 4,100 persona – fëmijë, gra dhe të moshuar. Të gjithë mbetën pa strehë”, tha për CNN zëdhënësi i Mbrojtjes Civile së Gazës, Mahmoud Basal.

CNN thekson se shkatërrimet në Gaza ishin të dukshme edhe para se kabineti izraelit të shpallte planet për ofensivën, por ritmi i prishjeve është intensifikuar dukshëm pas gushtit.