Kreu i grupit parlamentar të Partisë Socialiste, Bledi Çuçi përmes një postimi në rrjetet sociale përshëndeti arritjen e dakordësisë për rezolutën e Kosovës.
Mazhoranca dhe opozita arritën një marrëveshje për votimin e një rezolute ditën e nesërme në Kuvend, ku dënohet agresioni i Serbisë më datë 24 shtator në veriun e Kosovës.
Çuçi shprehet se PS ka qenë gjithnjë në mbështetje të Kosovës pa asnjë ekuivok, qoftë edhe në këtë rast, ku sipas tij është plotësuar një tekë e opozitës.
Postimi i Çuçit në FB:
𝐋𝐚𝐣𝐦 𝐢 𝐦𝐢𝐫𝐞̈
Përpjekjet mazhorancë-opozitë për gjetjen e dakordësisë për Rezolutën që dënon sulmin terrorist në veri të Kosovës u finalizuan me sukses. Arritëm të kemi një tekst të përbashkët, ku shprehim pa asnjë rezervë mbështetjen për Rezolutën e Kuvendit të Kosovës.
Pas votimit nga deputetët në seancën parlamentare, qeveria dhe institucionet e tjera shqiptare duhet të influencojnë dhe kërkojnë një hetim ndërkombëtar për sulmin dhe nxjerrjen sa më parë të autorëve përpara drejtësisë.
Partia Socialiste tregon edhe njeherë se kur vjen puna për Kosovën ka një qëndrim të qartë, pavarësisht blofit të dalë boje apo kurtheve të politikës së vjetër për luftën e brendshme.
Vijimësisht e kemi dëshmuar me vepra mbështejten pa asnjë ekuivok ndaj Kosovës, qoftë dhe duke plotësuar ndonjë tekë të opozitës si në këtë rast. PS ka qenë dhe do të jetë konsistente në mbështetjen pa kushte ndaj Kosovës.
