Mediat fqinje kanë publikuar rezultatet e autopsisë së Bledar Dedja, 39-vjeçarit shqiptar i cili u gjet i vrarë më 20 janar në një pyll në Itali. Sipas autopsisë, Dedja ka marrë 20 goditje me thikë, por ajo që rezultoi fatale ishte goditja që i shpoi mushkërinë.

Hetuesit italianë dyshojnë se ky akt vrasjeje me thikë ka ndodhur pak pasi Dedja kishte kryer marrëdhënie seksuale. Gjatë autopsisë janë marrë mostra për të zbuluar më shumë për ngjarjen.

Patologu Alberto Furlanetto, i cili kreu autopsinë, konfirmoi se vdekja u shkaktua nga një gjakderdhje e brendshme dhe ishte rezultat i një plagë me thikë në shpinë. Plagët e tjera me thikë tregojnë se viktima u godit në pjesë të ndryshme të trupit, duke përfshirë duart dhe krahët.

Hetuesit mendojnë se goditja me thikë ka ndodhur në fund të marrëdhënies seksuale, pasi Dedja kishte ulur pantallonat dhe të brendshmet. Bashkëshortja e tij është intervistuar nga hetuesit për shumë orë dhe për momentin, hetuesit po ndjekin pistën për vrasje pasioni në fund të një marrëdhënieje seksuale.

Megjithatë, nuk mund të përjashtohet mundësia që pantallonat e ulura të jenë një shpërfytyrim dhe një shenjë hakmarrjeje për të goditur Dedjan, pasi dyshohet se ai ka pasur marrëdhënie jashtëmartesore me gruan e një bashkatdhetari. Hetuesit mbajnë të hapura dy hipotezat e mundshme për ngjarjen.