Isa Myzyraj akuzon mazhorancën për thyerje besimi: Thirrje deputetëve të mos votojnë projektligjin për shpifjen
Gazetari Isa Myzyraj ka akuzuar mazhorancën qeverisëse për thyerje të besimit dhe tërheqje nga marrëveshja për dekriminalizimin e plotë të shpifjes dhe fyerjes, duke e cilësuar procesin si një dështim serioz të konsultimit publik.
Në një prononcim për mediat, Myzyraj u bëri thirrje të gjithë deputetëve të Kuvendit të Shqipërisë që të mos votojnë projektligjin e propozuar nga qeveria, duke theksuar se ai bie ndesh me dakordësinë e mëparshme mes forcave politike dhe shoqërisë civile.
Sipas tij, organizatat e shoqërisë civile, veçanërisht ato që merren me mbrojtjen e lirisë së medias, kanë qenë të angazhuara prej muajsh në proces konsultimi, në mirëbesim me të gjitha partitë politike. Myzyraj deklaroi se deri më 21 janar kishte pasur dakordësi të plotë nga mazhoranca dhe opozita për dekriminalizimin total të shpifjes dhe fyerjes.
“Fatkeqësisht, mazhoranca e ndryshoi qëndrimin brenda ditës, duke treguar se procesi i konsultimit mund të kthehet lehtësisht në një formalitet që i shërben vetëm interesave të saj”, u shpreh ai.
Gazetari nënvizoi se në seancën parlamentare pritet të shqyrtohet edhe projektligji alternativ i propozuar nga deputetja e opozitës, Jorida Tabaku, kryetare e Komisionit për Mediat, draft me të cilin, sipas Myzyrajt, palët kanë rënë dakord parimisht. Ky projektligj parashikon heqjen nga Kodi Penal të neneve 119 dhe 120, duke dekriminalizuar plotësisht fyerjen dhe shpifjen.
Duke iu përgjigjur argumenteve se gazetarët duhet të mbajnë përgjegjësi për deklaratat e tyre, Myzyraj theksoi se kjo përgjegjësi duhet të jetë civile dhe jo penale. “Gazetarët dhe çdo qytetar duhet të mbajnë përgjegjësi për fjalën e tyre në gjykatën civile, jo në gjykatën penale”, deklaroi ai, duke shtuar se ideja e imunitetit për median nuk qëndron.
Sipas Myzyrajt, mënyra se si po trajtohet kjo çështje rrezikon jo vetëm lirinë e medias, por edhe besueshmërinë e proceseve konsultative dhe përpjekjet e Shqipërisë në rrugën drejt integrimit në Bashkimin Evropian.
