Dalja e kryetarit të Partisë Demokratike, Lulzim Basha, shkaktoi reagime të ndryshme dhe konfuzion në radhët e partisë. Ndërsa kryedemokrati shprehu synimin për një opozitë të bashkuar, grupimi i quajtur “Rithemelimi” dhe disa figura brenda PD-së nisën sulmet ndaj tij. Gazment Bardhi dhe sekretari i Përgjithshëm i Rithemelimit, Flamur Noka, organizuan një mbledhje ku distancoheshin nga Basha, duke theksuar se do të vazhdojnë përpjekjet për të rikthyer demokracinë në PD. Nënkryetarja e PD-së, Flutura Açka, në një reagim, theksoi se nuk do të ketë bashkim me grupin e Rithemelimit nëse nuk bëhet distancimi nga personat non grata. Ajo gjithashtu shtoi se konflikti mund të ndikojë në pjesëmarrjen e elektoratit gri në zgjedhjet e ardhshme. Në këtë kontekst, Basha u këshilloi të tjerët të mos marrin pjesë në një klub ku SPAK-u quhet bandë kriminale.
Reagon PD zyrtare
Por teksa çeta anti-amerikane vijon hedhjen e baltës ndaj kryedemokratit Lulzim Basha, Partia Demokratike është e vendosur në qëndrimin e saj, se nuk do të ketë asnjë bashkim me grupin e Rithemelimit dhe të Gazment Bardhit nëse këta të fundit nuk distancohen nga personat non grata. Nënkryetarja, njëherësh deputetja e PD, Flutura Açka në një intervistë për mediat dje theksoi se nuk mund të shkojnë dhe të bëhen bashkë me një klub që quan SPAK-un bandë kriminale. Sipas Açkës, grupimi i tyre është tashmë një federatë, ndërsa paralajmëroi se nëse elektorati gri shikon këtë përçarje nuk do të afrohet për zgjedhjet parlamentare të 2025. “Ata janë në një federatë, nuk është se do të ndodhë ndonjë ndryshim i madh. Fakti që bashkëpunojnë do të thotë se janë në një federatë. Nëse ky konflikt në PD do të vazhdojë demokratët që janë të lidhur me të djathtën, elektorati gri do të refuzojë të marrë pjesë në zgjedhje. Nuk do të afrohen nëse shohin këtë lloj përçarje. Nuk u besoj këtyre bashkimeve artificiale. Nëse nuk bëhet distancimi nga non grata nuk mund të ketë vend për bashkim. Nuk mund të bësh një ftesë në një klub ku shahet SPAK-u si bandë kriminale. Personalja duhet të ndahet nga politika”, deklaroi Açka.
