Në arenën legjendare të “Wembley”-t në Londër u zhvillua një përballje madhështore për titullin e peshave të rënda në boks, ku Daniel Dubois triumfoi duke mbetur kampion i titullit IBF. Ai mposhti me nokaut Anthony Joshua, një nga emrat më të njohur në këtë sport.

Që në raundin e parë, Dubois e dominoi bindshëm duelin, duke goditur Joshuan me një të djathtë të fuqishme që e tronditi rëndë. Goditja ishte aq e fortë sa Joshua ra në gjunjë, por fatmirësisht për të, koha e raundit përfundoi duke e shpëtuar nga një disfatë e hershme.

Dubois, që e mori avantazhin që në fillim të sfidës, vijoi presionin e tij gjatë gjithë raundeve. Joshua përpiqej të rikuperohej, por Dubois vazhdonte t’i dhuronte goditje të fuqishme, këtë herë me të majtën. Situata u përsërit edhe në raundin e katërt dhe të pestë, por në këtë pikë, Joshua nuk arriti të rimëkëmbej pas një goditjeje të fuqishme nën mjekër, që detyroi gjyqtarin të ndërpriste duelin.

Në përfundim, Joshua ra në raundin e parë, të tretë dhe të katërt, por në raundin e pestë nuk mundi të ngrihej më. Ky u bë momenti i humbjes më të rëndë të karrierës së tij. Pavarësisht se vlerësohej si favorit për këtë përballje, ai u shkatërrua nga Dubois, i cili i tregoi botës se ishte një luftëtar i vërtetë.

Deklaratat pas ndeshjes

Pas fitores, Daniel Dubois shprehu mirënjohjen e tij dhe falënderoi Zotin për bekimin që kishte marrë. “A nuk jeni të mahnitur? A kërkonit spektakël?”, ishin fjalët e para që boksieri u drejtoi të pranishmëve. Dubois e pranoi se ishte parë si jo-favorit, por theksoi se kjo nuk ishte hera e parë që e shikonin kështu. “Jam mirënjohës që jam në këtë pozicion. Zoti më bekoi. Jam një gladiator, jam një luftëtar deri në fund,” deklaroi ai me krenari, duke theksuar se kishte punuar shumë për këtë moment.

Nga ana tjetër, pas humbjes me K.O., Anthony Joshua tregoi respekt për rivalin e tij dhe vlerësoi përgatitjet e ekipit të Dubois. Ai pranoi se ndonëse ishte i zemëruar për rezultatin, do të ruante qetësinë dhe do të vazhdonte të luftonte. “Unë kisha një kundërshtar të shpejtë, por bëra shumë gabime nga fundi,” tha ai, duke premtuar se do të kthehet më i fortë.

**Të ardhurat nga dueli**

Ndërkohë, për sa i përket të ardhurave, raportohet se Daniel Dubois ka arkëtuar katër milionë euro për këtë ndeshje, por kjo shifër mund të rritet deri në mbi 10 milionë euro, në varësi të shitjeve nga shikimet (pay-per-view). Kjo fitore përbën përfitimin më të madh financiar për Dubois, duke tejkaluar të ardhurat e tij nga humbja në gusht 2023 kundër Oleksandr Usyk, ku fitoi rreth dy milionë euro.

Nga ana tjetër, pavarësisht humbjes, Anthony Joshua pritet të marrë në shtëpi rreth shtatë milionë euro. Megjithatë, kjo shifër mund të shkojë deri në 30 milionë euro, gjithashtu në varësi të shikueshmërisë së duelit.