Në seancën e sotme plenare të Kuvendit, deputeti demokrat Dashnor Sula shkaktoi një moment të pazakontë kur u paraqit në Kuvend me veshjen e të burgosurit. Ai e përdori këtë veprim për të kritikuar qeverinë për kushtet që u ofrohen të burgosurve në Shqipëri, duke thënë se ata janë të detyruar të veshin rroba të zakonshme, ndërkohë që në shumë shtete të botës, të burgosurit vishen me uniformë.

Sula e shfrytëzoi këtë rast për të ironizuar me tenderët që qeveria ka shpallur për blerjen e sendeve luksoze, duke përmendur një tender për një kapelë me çmim 350 euro. Ai i kërkoi ministrit të Drejtësisë, Ulsi Manja, të ndërmerrte një iniciativë për të organizuar një tender për uniformat e të burgosurve, duke e cilësuar trajtimin e tyre si një turp.

Pjesë nga deklarata e Sula:

Sula: “Në të gjithë botë të burgosurit kanë uniformën e tyre, ndërsa të burgosurit tanë janë me rrobat e shtëpisë. Po i jap shansin qeverisë që, siç bëri tenderin 350 euro për një kapele, bëni një tender edhe për të burgosurit që të vishen me një Hugo Boss. Unë këtë veshje që përdora do t’ja jap ministrit të Drejtësisë, që të iniciojë dhe atyre të burgosurve t’u jepni ndonjë rrobë, se është turp, bëni ndonjë tender.”

Ky akt i deputetit Sula ishte një mënyrë e drejtpërdrejtë për të hedhur dritë mbi problemet që ai e shikon në sistemin e drejtësisë dhe trajtimin e të burgosurve, ndërkohë që kërkoi një reagim nga qeveria për të përmirësuar këtë situatë.