Deputeti i Partisë Demokratike, Dashnor Sula, ka folur për protestën e planifikuar më 7 tetor, duke shprehur se ai nuk është pjesë e kupolës së lartë të opozitës për të pasur informacion të detajuar mbi zhvillimet që priten. Në një intervistë televizive, Sula theksoi rëndësinë e angazhimit të çdo deputeti për të kontaktuar qytetarët dhe për të punuar në organizimin e një proteste madhështore.

“Detyra jonë është të punojmë, bashkë me strukturat, për një protestë madhështore. Por nuk jam në dijeni të detajeve,” u shpreh Sula.

Ai theksoi se opozita duhet të vazhdojë me kursin që ka nisur, duke denoncuar arrogancën e pushtetit aktual. “Arroganca e këtij pushteti nuk pyet më për askënd. Këta mendojnë se i përket gjithçka, këta mendojnë se shqiptarët duhet të hanë bukë kur i thonë ata, duhet të marrin frymë kur i thonë ata. Këta kanë harruar gjithçka tjetër,” tha Sula, duke theksuar nevojën për një mobilizim të qytetarëve për të shprehur pakënaqësitë e tyre.