Nga Ohri ku merr pjesë në samitin e radhës së nismës Ballkani i Hapur, kryeministri Edi Rama ka komentuar dhe deklaratat e bëra nga ministri i Jashtëm i Rusisë Sergei Lavrov.
Rama tha se Ballkani është tërësisht i mbyllur për Lavrov, ndaj dhe ai nuk ka mundur dot të hyjë në rajon, duke iu referuar dhe anulimit të vizitës së tij të hënën në Serbi.
“Të peshkohesh kaq kollaj nga sarkazma e një personazhi të mirënjohur botërisht për gjuhën e tij sarkastike e pastaj nga manipulimi i kësaj sarkazme nga ata që i fryjnë zjarrit të ndasisë dhe urrejtjes për interesa të politikës së ditës në katundet ballkanike, është për të ardhur keq.
Nëse zotëria do të ishte promovuesi apo mbështetësi i Ballkanit të hapur, Ballkani do ishte i hapur minimalisht për të.
Ballkani për të është i mbyllur tërësisht, ndaj s’ka marrë dot leje për të hyrë në Ballkan nga vendet e Ballkanit që të jemi të qartë”, tha Rama.
