Prokuroria italiane ka kërkuar rritjen e dënimit për autorin e vrasjes së 23-vjeçarit shqiptar Klajdi Bitri, krim i ndodhur më 27 gusht 2023 në Sirolo.

Gjatë seancës në Ankona, Prokurori i Përgjithshëm Roberto Rossi paraqiti argumentet përfundimtare, duke kërkuar rishikimin e vendimit të shkallës së parë për 29-vjeçarin tunizian Fatah Melloul. Sipas akuzës, në vendimin fillestar nuk janë marrë plotësisht parasysh rrethanat rënduese, përfshirë motivet e dobëta që çuan në krim.

Ngjarja ndodhi pas një konflikti të çastit për motive trafiku, ku Melloul goditi për vdekje Bitrin me një pushkë me shtiza dhe më pas u largua nga vendi i ngjarjes. Ai u arrestua disa orë më vonë nga karabinierët në Falconara, teksa po kthehej nga bregdeti.

Në shkallën e parë, gjykata e kishte dënuar autorin me 18 vite burg. Në apel, i pandehuri ka bërë deklarata spontane, duke pretenduar se nuk kishte qëllim vrasjeje.

“Jemi qenie njerëzore dhe bëjmë gabime. Mora shtizën vetëm për të trembur,” u shpreh ai, duke kërkuar falje për ngjarjen.

Nga ana tjetër, mbrojtja ka kërkuar rikualifikimin e akuzës, duke përfshirë elementë të vetëmbrojtjes dhe uljen e përgjegjësisë penale, ndërsa vendimi përfundimtar pritet në vijim.