Lëvizja Vetëvendosje (LVV) është dënuar me 3,000 euro nga Paneli Zgjedhor për Ankesa dhe Parashtresa për përdorimin e gjuhës së ashpër nga kryeministri Albin Kurti gjatë një tubimi elektoral të këtij subjekti politik në Pejë. Dënimi ka ardhur pas një ankese të Lidhjes Demokratike të Kosovës (LDK), që akuzoi Kurtin për shkelje të Kodit të Mirësjelljes dhe përdorim të gjuhës së urrejtjes.

Në ankesën e LDK-së, janë përmendur disa raste të gjuhe të ashpër të përdorur nga Kurti, përfshirë krahasimin e qëndrimeve politike të LDK-së me ato të Serbisë së Millosheviçit dhe përdorimin e terma pezhorativ për partitë opozitare, LDK dhe PDK, që i akuzoi për bashkëpunim në koalicion. Po ashtu, Kurti kishte krahasuar opozitën me një mizë që duhet shtypur dhe kishte shpërndarë video në rrjetet sociale, të cilat janë konsideruar të papërshtatshme.

Paneli Zgjedhor ka vlerësuar se ankesa e LDK-së është pjesërisht e bazuar dhe ka vendosur të dënojë Lëvizjen Vetëvendosje me 3,000 euro, që duhet të paguhen brenda 15 ditësh. Retorika politike e Kryeministrit Kurti ka qenë e ashpër që në fillim të fushatës zgjedhore, duke përdorur terma të papërshtatshëm dhe duke përfshirë të mitur në tubime, gjë që është e ndaluar me ligj.

Në këtë rast, gabimi nuk është vetëm i Kryeministrit Kurti, por edhe i këshilltarëve të tij, të cilët duket se e shtyjnë atë në përdorimin e një gjuhe të tillë të rrezikshme, duke i sjellë Kosovës një ndëshkim të rëndë financiar. Zgjedhjet e përgjithshme parlamentare do të mbahen më 9 shkurt, dhe kjo mund të ndikojë në garën për formimin e qeverisë dhe konfigurimin e Kuvendit të Kosovës me 120 vende.