Një 16-vjeçar në Itali është dënuar sot me 17 vite burg për vdekjen tragjike të 13-vjeçares shqiptare Aurora Tila, e cila humbi jetën pasi ra nga ballkoni i banesës së saj në Piacenza, më 25 tetor 2024.

Sipas raportimeve të “Ansa”, seanca gjyqësore u zhvillua në Gjykatën e të Miturve në Bolonja, ku gjyqtari pranoi pjesërisht kërkesën e prokurorisë, që kishte kërkuar 20 vite e 8 muaj burg për autorin.

Hetimet zbuluan se viktima dhe 16-vjeçari kishin qenë në një marrëdhënie sentimentale, e cila kishte përfunduar pak para ngjarjes fatale. Sipas mediave italiane, Aurora kishte vendosur të ndante rrugët për shkak të problemeve dhe konflikteve të vazhdueshme me të riun.

Ngjarja tronditi opinionin publik në Itali dhe në komunitetin shqiptar, duke hapur sërish debatin mbi dhunën dhe presionin emocional tek të miturit.