Deputetët e Partisë Demokratike kanë shprehur nevojën për gjetjen e formave të reja për reagim ndaj bllokimet e tyre në seancat parlamentare që kanë zgjatur për tre muaj. Ervin Salianji, nënkryetar i grupit parlamentar të PD-së, ka thënë se është e rëndësishme të diversifikohet qëndrimi dhe reagimi i opozitës, duke shprehur nevojën për një radikalizim të metodave dhe angazhimit të mëtejshëm të opozitarëve.

“Ne duhet të gjejmë një rrugë të re, duke diversifikuar mënyrat dhe format e reagimit. Është e rëndësishme të prodhojmë një radikalizim, duke përfshirë njerëzit dhe duke shqyrtuar çështje të tjera që janë në fokus të shoqërisë”, deklaroi Salianji.

Ai gjithashtu vlerësoi se qëllimi i aksionit të deritanishëm është i përmbushur, por theksoi se opozita duhet të vijojë të kërkojë zgjidhje për çështjet e tjera, duke përfshirë krijimin e komisioneve hetimore dhe diskutimin e përbërjes së komisionit të reformës zgjedhore. Nëse këto sfida rrezikojnë të vonohen, Salianji ka sugjeruar që opozita të marrë një rrugë alternative për të shprehur shqetësimet e tyre politike.

“Ne nuk duhet të vazhdojmë të mbetemi peng të kësaj çështjeje. Duhet të gjejmë një rrugë, ose të bashkohemi në diversitet ose, në rast të kundërt, secili të ndjekë rrugën e tij duke bërë politikën sipas bindjeve të veta”, shtoi ai.