Është zhvilluar në Kuvend, seanca e tretë për zgjedhjen e presidentit të vendit, raund i cili ka dështuar për shkak se nuk është paraqitur asnjë kandidaturë.

Ajo që u vërejt në këtë seancë ishte mungesa e deputetëve të PD-së, të cilët pranuan të ishin pjesë e negociatave për zgjedhjen e presidentit. E vetmja nga opozita që ka qenë e pranishme në sallë është deputetja Ina Zhupa.

Më pas në sallë kanë mbërritur dhe përfaqësues të tjerë të Rithemelimit, si deputetët Edi Paloka, Luçiano Boçi dhe Luan Baçi.

Tashmë zgjedhja e presidentit të ri të vendit, duket se është një punë vetëm e socialistëve, pasi në raundin e katërt dhe të pestë, Kushtetuta e parashikon që kreu i shtetit të zgjidhet me shumicë të thjeshtë votash, për të shmangur krizën institucionale, dhe dërgimin e vendit drejt zgjedhjeve të parakohshme.

Fillimisht opozita e drejtuar nga Enkelejd Alibeaj, u bë pjesë e negociatave për zgjedhjen e presidentit, por në ditët e fundit, duke mos marrë garanci se socialistët do të mbështesnin propozimet e tyre, zgjodhën të linin në mes procesin, me pretendimet se kishin nxjerrë Edi Ramën ‘lakuriq’.

Raundi i katërt pritet të mbahet jo më larg se e hëna e javës së ardhshme, ku pritet të kemi dhe presidentit e ri të vendit, i cili do të pasojë në këtë post Ilir Metën, ndërsa ky i fundit do ti kthehet jetës aktive politike.