Deputeti socialist Lavdrim Krashi ka shprehur shqetësimin e tij për zhvillimet e fundit në seancat parlamentare, duke e cilësuar situatën si të papranueshme dhe duke kërkuar një fund për të. Ai theksoi se votuesit nuk e kanë dërguar parlamentin për të përjetuar skena të tilla të turpshme.

“Secili nga ne ka përgjegjësitë tona në 34 vite, por vjen momenti që bëhet një kthesë. Mendoj se aty ku fillon forca dhe dhuna, mungon argumenti,” tha Krashi.

Ai përmendi bllokimin e hyrjes kryesore të parlamentit nga opozita, duke shprehur mirëkuptim për ngarkesën e kolegëve të saj, por duke theksuar se zgjidhja nuk është nëpërmjet forcës.

“Mënyra se si shprehen pikëpamjet nuk është mënyra e përshtatshme. Politikanët e përgjegjshëm duhet të bëjnë kthesë dhe të respektojnë institucionet,” theksoi Krashi.

Në një intervistë televizive, ai shpresoi se deri në fund të nëntorit, kur pritet miratimi i buxhetit, do të shmanget situata aktuale parlamentare.