Deputetja e Partisë Socialiste, Dasantila Tahiraj, njëherësh anëtare e Komisionit të Medias dhe Arsimin, solli detaje të reja nga marrëveshja e firmosur pak ditë më parë mes qeverisë shqiptare dhe asaj italiane për pensionet e shqiptarëve që jetojnë e punojnë në shtetin fqinj.
E ftuar në një program televiziv, Tahiraj tha se brenda një muaji kjo marrëveshje do të ratifikohet si në Kuvendin e Shqipërisë, ashtu edhe në atë të Italisë. Ajo gjithashtu ndau informacion rreth procesit të ngjashëm me shtetet nordike dhe marrëveshjes me Greqinë, duke theksuar rëndësinë e mbështetjes për shqiptarët nëpër botë.
Deputetja gjithashtu sqaroi se marrëveshja nuk ka një kosto financiare të konsiderueshme, ndërkohë që garantohet mbajtja e kontributeve të shqiptarëve që jetojnë dhe punojnë në Itali. Ajo paralajmëroi se marrëveshja pritet të kalohet në Kuvendin e Shqipërisë dhe në Kuvendin Italian brenda një muaji nga data e nënshkrimit, duke theksuar rëndësinë e saj për komunitetin shqiptar.
“Shumë marrëveshje të tjera janë në proces dhe për shtetet nordike, sepse ne aktualisht ne kemi shumë shqiptarë nëpër botë të cilët ne duhet t’i mbështesim.
Edhe me Greqinë jemi në proces, janë zhvilluar dy takime deri më tani, por akoma nuk është konkretizuar dhe mendoj se realizimi i marrëveshjes me Italinë është një arritje shumë e madhe. Dhe ajo me Greqinë është e njëjta gjë dhe është mirëpritur nga shqiptarët që kontribuojnë atje.
Mungesa e një marrëveshje të tillë i rrezikon mospërfitimin e njohjes së kontributeve atje.
Marrëveshja nuk është se ka një kosto të mirëfilltë financiare, por me këtë marrëveshje nuk humbet kontributi i askujt.
Brenda një muaji kjo marrëveshje do të kalojë në Kuvendin e Shqipërisë dhe po ashtu do të ndodhë dhe në Itali, dhe menjëherë do të hyjë në fuqi”, u shpreh Dasantila Tahiraj
Lidhur me zhvillimet në parlament, Tahiraj theksoi rëndësinë e konsensusit në çështjet e reformave dhe nismave të mëdha. Në lidhje me opozitën, ajo e cilësoi aktualen situatë si një problem vetëm të opozitës në Kuvend.
