Ministri i Punëve të Brendshme të Serbisë, Ivica Daçiç, bëri të ditur të martën se ka marrë një informacion zyrtar lidhur me një person të dyshuar për dërgimin e mesazheve kërcënuese në disa lokacione të rëndësishme. Sipas Daçiçit, mesazhet kërcënuese janë dërguar në aeroportin “Nikola Tesla” në Beograd, në ambasadat serbe në Gjermani dhe Austri, si dhe në Qendrën e Beogradit për Politika të Sigurisë.

Daçiç sqaroi se personi i dyshuar është Denis Krasniqi, i lindur më 1998 në Zvicër, me prindër nga Kosova. Sipas informacioneve të marra nga autoritetet, Krasniqi aktualisht ndodhet në Kosovë, dhe është urdhëruar që të paraqitet në policinë zvicerane menjëherë pas kthimit të tij në Zvicër.

Në të njëjtën ditë, ministri serb i Punëve të Jashtme, Marko Gjuriç, deklaroi në një intervistë për televizionin Pink se ambasadat serbe në Gjermani dhe Austri kanë marrë kërcënime se do të jenë objekt sulmesh terroriste brenda 24 orëve të fundit. Gjuriç shtoi se për arsye të sigurisë, nuk do të jepte detaje të mëtejshme pa u konsultuar me organet përkatëse të sigurisë, për të shmangur përkeqësimin e situatës.

Gjuriç bëri të ditur se masat e sigurisë janë shtuar në disa nga zyrat diplomatike dhe misionet konsullore të Serbisë në Evropë si përgjigje ndaj këtyre kërcënimeve. Radio Evropa e Lirë ka kontaktuar Ministrinë e Punëve të Jashtme të Kosovës për një përgjigje lidhur me deklaratat e Gjuriçit, por nuk ka marrë ndonjë reagim deri më tani.