Një detaj i dhimbshëm ka dalë në dritë pas aksidentit tragjik që ndodhi në hyrje të qytetit të Peqinit, ku humbën jetën dy të rinj, Gabriel Lluca dhe Denis Korbi, të dy 24 vjeç.

Mësohet se Gabriel Lluca, një nga viktimat, kishte kaluar një provë të tmerrshme kur ishte vetëm 8 vjeç. Në atë kohë, pranë shkollës “Demir Godelli”, një automjet i kishte kaluar mbi trup, duke i shkaktuar plagë të rënda dhe fraktura të shumta. Fëmija i vogël kishte luftuar mes jetës dhe vdekjes, por arriti të mbijetonte mrekullisht.

Por këtë fund gushti, fati nuk e kurseu. Në të njëjtin qytet ku dikur kishte shpëtuar për pak nga vdekja, Gabrieli humbi jetën në mesnatën e së dielës, pasi makina ku po udhëtonte u përplas me shkallët e një banese.

Dhimbja për familjen Lluca është edhe më e madhe, pasi vetëm tre vite më parë ata përjetuan një tjetër humbje të rëndë: ndarjen nga jeta të babait të Gabrielit, Agron Lluca.

Policia ka nisur hetimet për të zbardhur plotësisht shkaqet e aksidentit. Janë sekuestruar pamjet e kamerave të sigurisë në zonë, ndërsa po verifikohet shpejtësia e automjetit dhe gjendja e rrugës në momentin e ngjarjes.

Një histori që e bën tragjedinë edhe më të rëndë dhe që ka tronditur thellë Peqinin.