Detaje të reja janë zbuluar lidhur me ngjarjen e rëndë që ndodhi mëngjesin e sotëm në fshatin Vrakë, Malësi e Madhe. Incidenti ndodhi në hyrje të një lokali ku shtetasi Lul Rakaj shkrepte dy herë armën ndaj Besmir Qofit dhe Avenir Hasanajt, të cilët më pas u transportuan me urgjencë në spitalin rajonal të Shkodrës për ndihmë mjekësore.

Pas kryerjes së krimit, autori është larguar me shpejtësi nga vendngjarja. Policia dhe grupi hetimor kanë mbërritur menjëherë në vend, ku kanë nisur hetimet për zbardhjen e rrethanave dhe kapjen e autorit. Përpjekjet për arrestimin e tij janë përforcuar nga grupe të Forcës Kombëtare të Sigurisë dhe Njësia Shkodër, të cilat vijojnë kontrollet në zona të ndryshme ku dyshohet se mund të jetë fshehur.

Njoftimi i Policisë:

Malësi e Madhe/Informacion paraprak Rreth orës 09:45, në fshatin Vrakë, në hyrje të një lokali, dyshohet se shtetasi L. R., ka plagosur me armë zjarri shtetasit B. Ç dhe A. H, të cilët janë transportuar në spitalin rajonal të Shkodrës për ndihmë mjekësore.

Shërbimet e Policisë kanë shkuar menjëherë në vendngjarje bashkë me grupin hetimor dhe drejtues të Drejtorisë Vendore të Policisë Shkodër. Në ndihmë të Policisë Vendore për kapjen e autorit kanë shkuar dhe grupe të Forcës Kombëtare të Sigurisë, Njësia Shkodër dhe vijojnë kontrollin e zonës dhe në ambjente të ndryshme ku dyshohet se mund të jetë fshehur autori i dyshuar. Grupi hetimor në drejtimin e Prokurorisë po punon për zbardhjen e rrethanave dhe dokumentimin ligjor të rastit.