Një ngjarje e rëndë ndodhi mbrëmjen e djeshme në Fier, ku një banesë u përfshi nga flakët. Policia ka zbuluar se djali 42-vjeçar i çiftit të moshuar, banorë të apartamentit, dyshohet se ka tentuar të vrasë prindërit e tij duke i mbyllur brenda dhe duke i vënë zjarrin banesës.

Pas ndërhyrjes së shpejtë të zjarrfikësve dhe Policisë, të moshuarit u nxorën nga banesa në gjendje të mirë shëndetësore, ndërsa flakët u vunë nën kontroll. Djali i tyre, shtetasi A. S., 42 vjeç, është arrestuar nga policia dhe do të përballet me akuzat për “Vrasje për shkak të marrëdhënieve familjare”, mbetur në tentativë, “Dhuna në familje” dhe “Shkatërrimi i pronës me zjarr”.

Nga hetimet rezulton se 42-vjeçari ka ushtruar dhunë të përsëritur ndaj prindërve të tij, dhe tashmë rasti i tij do të kalojë për veprime të mëtejshme në Prokurori.