Autori i dyshuar për vrasjen e 14-vjeçarit Martin Cani është marrë në pyetje nga grupi hetimor, duke dhënë detaje mbi konfliktin që përfundoi tragjikisht. I mituri, gjithashtu 14 vjeç, ka deklaruar se sherri mes tyre kishte nisur që të premten për një arsye banale: sipas tij, viktima e kishte parë në mënyrë që ai e interpretoi si provokim.

“Jemi zënë të premten sepse po më shikonte. E kishim lënë për t’u sqaruar. Pastaj jemi zënë sërish të hënën,” ka thënë ai gjatë marrjes në pyetje.

Sipas autorit, sherri ka nisur brenda ambienteve të shkollës të hënën dhe situata ishte përshkallëzuar pavarësisht ndërhyrjes së oficeres së sigurisë. Përplasja u zhvendos jashtë ambienteve të shkollës, ku viktima dhe autori sollën edhe shokët e tyre për t’i mbështetur.

“Gjatë përleshjes ndodhi ajo që ndodhi,” ka rrëfyer i mituri, duke iu referuar momentit kur ai goditi me thikë viktimën.

Pavarësisht pyetjeve nga grupi hetimor, autori nuk ka pranuar të flasë për pendesë dhe as të tregojë vendndodhjen e thikës së krimit. Ai ka deklaruar se nuk e kishte futur thikën brenda shkollës, por e kishte fshehur pranë saj.

Ky rrëfim ka ngjallur reagime të forta, duke sjellë në vëmendje jo vetëm dhunën mes të rinjve, por edhe mungesën e masave efektive për parandalimin e situatave të tilla në shkolla. Autoritetet vazhdojnë hetimet për të përcaktuar saktësisht rrethanat e ngjarjes dhe përgjegjësitë e palëve të përfshira.