Gazetarja Anduena Llabani ka dhënë më tepër detaje për vrasjen e 28-vjeçarit Klajdi Prendi, djali i ish-gjyqtarit Fani Prendi, i cili u ekzekutua më 19 nëntor. Sipas saj, ka të dhëna që tregojnë se viktima ka qenë i shoqëruar nga dy efektivë të policisë në momentin e ekzekutimit të tij.

Llabani theksoi se rreth 4-5 ditë përpara vrasjes, Klajdi Prendi kishte pasur një konflikt fizik me disa persona, të cilët dyshohet të jenë pjesë e një grupi rival të Ervis Martinaj. Ky grup, sipas informacionit, kishte goditur Prendin me tytën e pistoletës në një rrugicë të Tiranës.

“Lokali ku unë qëndroja bashkë me një pjesë të stafit tim, ishte ngjitur me lokalin ku qëndronte viktima. Në atë zonë ka shumë makina dhe patrulla policie, të cilat kontrollojnë rrugën dhe vendosin gjoba për parkimin e gabuar. Vetëm 10 minuta para se të ndodhte ngjarja, ne jemi larguar,” tha Llabani.

Ajo gjithashtu konfirmoi se ka informacion që tregon se Prendi ishte i shoqëruar nga dy efektivë të policisë, duke aluduar se mund të ketë pasur një arsye të veçantë për këtë shoqërim. Përveç kësaj, Llabani nënvizoi se konflikti i tij me personat të lidhur me Ervis Martinaj mund të ketë qenë një nga shkaqet që çuan në vrasjen e tij.

Të dhënat e reja nga gazetarja dhe informacionet për konfliktet e mëparshme të viktimës po hedhin dritë mbi mundësinë që vrasja të jetë pasojë e një përplasjeje të mëparshme mes grupeve të ndryshme kriminale në Tiranë.