Shqipëria e përfundoi aventurën e saj në Ligën e Kombeve me një humbje 1-2 ndaj Ukrainës në stadiumin Air Albania. Ndeshja, e cila mbylli garën për kuqezinjtë në këtë edicion, solli zhgënjim për trajnerin Sylvinho dhe kapitenin Ardian Ismajli, të cilët pranuan gabimet dhe kërkuan reflektim për të ardhmen.
Sylvinho: “Dy golat e shpejtë na vranë”
Trajneri Sylvinho pranoi se skuadra gaboi në këtë ndeshje dhe theksoi rëndësinë e përmirësimit për t’u përballur me sfidat e ardhshme në nivelin e lartë të futbollit ndërkombëtar.
“Dy golat e shpejtë ishin vrastarë. Kjo na ka ndodhur edhe me Çekinë. Duhet të rritemi sepse ky është nivel i lartë ku luajmë dhe duhet të kapim ritmin. Një vit më parë fituam grupin si të parët dhe shkuam në Europian të gjithë si grup, dhe sot kemi gabuar të gjithë si grup. Përfunduam Ligën e Kombeve në vend të fundit, por një gol mund të kishte bërë ndryshimin dhe të na ngjiste në vendin e dytë. Kjo është natyra e futbollit dhe duhet të mësojmë nga gabimet për të ardhmen,” deklaroi Sylvinho.
Ismajli: “Pjesa e parë më e keqe në tre vite”
Kapiteni Ardian Ismajli, duke analizuar ndeshjen, pranoi se pjesa e parë ishte ndër më të dobëtat e Kombëtares në vitet e fundit. Ai kërkoi nga ekipi që kjo përvojë të shërbejë si mësim dhe të shmanget përsëritja e gabimeve.
“Pjesa e parë ka qenë ndeshja më e keqe në këto tre vite. Nuk do të kemi gjithmonë fatin me vete. Në pjesën e dytë nuk kishim çfarë të humbisnim dhe provuam të bëjmë maksimumin, por nuk ia arritëm. Me një pikë do të ishim në ‘play-off’. Kjo humbje na tregon që duhet të mësojmë nga gabimet dhe të mos e lejojmë më një performancë të tillë. Kur je përballë 20 mijë tifozëve, lodhja nuk duhet të ndikojë. Pjesa e dytë ishte e mirë, por nuk mjaftoi. Në pjesën e parë morëm dy gola shpejt dhe kjo na dëmtoi rëndë,” tha Ismajli.
Kapiteni shtoi gjithashtu se për disa zgjedhje taktike kishte mendimin e tij, por si profesionist nuk preferoi të komentonte.
Pavarësisht zhgënjimit, si trajneri ashtu edhe kapiteni apeluan për fokusim në përmirësimin e skuadrës dhe për të parë përpara drejt sfidave të reja, duke ndërtuar mbi mësimet e nxjerra nga kjo ndeshje dhe ky edicion i Ligës së Kombeve.
