Podujeva u trondit para dy ditësh nga një rast vrasjeje, ku 18-vjeçari Lulzim Fejzullahu u qëllua nga dy djem të tjerë. Së fundmi, detaje të reja kanë dalë në dritë, duke përfshirë deklaratat e avokatit Meshari Selimaj. Avokati shprehet se vrasja e 18-vjeçarit duhet cilësuar si vrasje e rëndë, duke u bazuar në faktin se ai është përplasur fillimisht me një makinë dhe më pas është goditur me shufra hekuri.

Duke shpjeguar nenet e kodit penal, Selimaj thekson se prokurorët dhe gjyqtarët duhet të kenë parasysh se vrasja e rëndë cilësohet si vrasja në mënyrë mizore dhe dinake, e njëjtë me atë të 18-vjeçarit. Ai shton se vrasja e rëndë përfshin edhe sulmin e viktimës në mënyrë të keqe, lënien e tij në vendngjarje dhe largimin pa u interesuar për gjendjen e tij.

“Është dispozita e kodit tonë penal, vrasje në mënyrë mizore dhe dinake. Ligjvënësit e kanë parë që kur viktima është rrahur dhe është lënë jashtë për orë të tëra. Sipas kodit penal, vrasja mizore është që kur sulmuesit pasi e kanë goditur fortë viktimën, e kanë lënë në vend. Pra pa e ditur nëse do të përmendet ai apo jo. Do të rrijë një orë, 2 orë, apo gjithë natën. Procedura për të mitur është procedurë shumë e shpejtë. Duhet të merren shpejt deklaratat dhe çështja të çohet për gjykim”, tha avokati.