Një operacion i përbashkët i Policisë Kufitare dhe Seksionit për Hetimin e Narkotikëve të DVP Korçë ka parandaluar një rast të tentativës për trafikim të lëndëve narkotike drejt Greqisë.

Ngjarja ka ndodhur në zonën mbi fshatrat Vidohovë dhe Ponçarë të Devollit, pranë piramidave 43 dhe 44 të kufirit shtetëror. Gjatë patrullimit të zonës, shërbimet policore kanë konstatuar në largësi dy shtetas të paidentifikuar që transportonin dy çanta të dyshuara.

Në momentin që janë ndjekur nga policia, dy personat kanë braktisur çantat dhe janë larguar në drejtim të thellësisë së territorit shqiptar, duke përfituar nga terreni i vështirë. Autoritetet shqiptare kanë njoftuar menjëherë edhe autoritetet greke për koordinimin e veprimeve në vijim.

Në vijim të veprimeve, grupi hetimor ka kryer kontrollin e çantave të braktisura, duke sekuestruar në cilësinë e provës materiale 20 pako me lëndë narkotike të llojit kanabis, me një peshë totale prej 32.3 kilogramësh.

Policia njofton se vijojnë intensivisht hetimet për identifikimin dhe kapjen e autorëve të kësaj tentative të trafikimit të drogës përtej kufirit.

Operacioni i suksesshëm i policisë është pjesë e masave të shtuara për të luftuar trafikun e lëndëve narkotike përgjatë kufirit të gjelbër.