Ministri i Shëndetësisë, Venko Filipçe me anë të një postimi në rrjetet sociale ka konfirmuar lajmin se dhjetë persona kanë humbur jetën si pasojë e zjarrit në spitalin Covid në Tetovë të Maqedonisë së Veriut.

Megjithatë ai nuk përjashton mundësinë që numri i viktimave të rritet.

“Në Tetovë ka ndodhur një fatkeqësi që ka marrë shumë jetë. Për momentin janë konfirmuar dhjetë të vdekur nga zjarri, por numri mund të rritet”, ka shkruar mes tjerash Filipçe në Twitter.

Ministria e Shëndetësisë ka njoftuar gjithashtu se të lënduarit nga zjarri  janë dërguar në Shkup.

“Zjarri tashmë është lokalizuar dhe të gjitha ekipet nga spitali janë mobilizuar që të ofrojnë ndihmë për të lënduarit. Ata urgjentisht transportohen në Shkup që t’u ofrohet kujdes adekuat, ekipet e Klinikës po mobilizohen. Ministri i Shëndetësisë, Venko Filipçe është në Tetovë. Pas ekspertizës në terren do të njoftojë publikun për gjendjen faktike”, thanë nga ministria.

Deri tani nuk dihen ende shkaqet e shpërthimit të zjarrit, ndërsa pesë prokurorë janë angazhuar dhe janë në terren ku po kryejnë ekspertizë për të vërtetuar shkaqet.