Detaje të reja janë zbardhur nga incidenti i ndodhur sot në fshatin Shelegar, në Sarandë, ku policia arrestoi autorin e dyshuar pas një ndjekjeje.

Sipas informacioneve paraprake, i arrestuari është 31-vjeçari Kristi Ceka, i cili dyshohet se kishte ardhur nga Borsh për të kanosur ish-bashkëjetuesen e tij, me të cilën ishte ndarë pas një lidhjeje rreth njëvjeçare.

Burime bëjnë me dije se pasi ka ushtruar dhunë ndaj saj, ai është përballur me kunatin e saj, të cilit i ka vendosur armën tip pistoletë në kokë duke e kërcënuar. Më pas, 31-vjeçari dyshohet se ka qëlluar rreth 4-5 herë me armë në ajër dhe është larguar nga vendi i ngjarjes me automjetin e tij tip “Audi Q7” me targa AB020RR.

Policia ka ndërhyrë menjëherë dhe pas ndjekjes ka arritur ta ndalojë në zonën e Borshit. I dyshuari pritet të shoqërohet në Komisariatin e Sarandës, ndërsa hetimet për zbardhjen e plotë të ngjarjes vijojnë.