Një punonjës i kompanisë shtetërore të sigurisë ‘Ilirian Guard’, rreth 36 vjeç, është dhunuar rëndë gjatë orarit të punës në qytetin e Vlorës.

Sipas raportimeve konflikti nisi pas një mosmarrëveshjeje mes 36-vjeçarit dhe një shoferi të një institucioni shtetëror në Vlorë. Shoferi refuzoi të lëvizte makinën, pavarësisht kërkesës së punonjësit të sigurisë. Pas përplasjes verbale, shoferi u largua, por u rikthye më vonë me dy djemtë e tij dhe disa shokë, duke e sulmuar fizikisht punonjësin e ‘Ilirian Guard’. Viktima u godit me mjete të forta në kokë dhe trup, duke pësuar dëmtime serioze.

Ngjarja është mbajtur e fshehtë, ndërsa autorët e sulmit vijojnë të jenë të lirë. Deri më tani, i vetmi person i shoqëruar është Selman Luzi, i cili pas disa orësh mbajtjeje në komisariat është lënë i lirë.

Ndërkohë, 36-vjeçari i dhunuar ndodhet prej tre ditësh në Spitalin e Vlorës, duke marrë trajtim mjekësor. Familjarët e tij kërkojnë drejtësi dhe ndëshkim për autorët e ngjarjes.