Diella, e cila u emërua së fundmi Ministre e Shtetit për Inteligjencën Artificiale, ka hapur tashmë faqen e saj zyrtare në Facebook, njoftoi kryeministri Edi Rama. Ai publikoi një video ku Diella prezantohet dhe shpalli linkun e faqes.

Në video, Diella thotë:

“Përshëndetje, unë jam Diella. Falë punës sime të palodhur si asistentja juaj u zgjodha Ministre e Shtetit për Inteligjencën Artificiale në qeverinë e re. Misioni im tani është të lehtësoj çdo ditë e më shumë punën e Qeverisë. Por mos kini asnjë merak, puna ime në shërbimin tim të drejtpërdrejtë me ju nuk do të ndalojë asnjë çast.”

Komentet e qytetarëve kanë qenë të shumta, me shumë urime dhe humor, duke e trajtuar Diellën si një person real. Një komentues shkruante:

“Kujdes nga tundimi për të ngrënë kumbulla si kolegët.”

Ministria për Inteligjencën Artificiale është një ndër risitë kryesore të strukturës së re qeveritare të prezantuar nga Rama, duke ngjallur debat për rolin e teknologjisë dhe inteligjencës artificiale në administratën publike.