Në Kuvend po debatohet intensivisht për projektligjin e pronave shtetërore, i cili synon të lejojë shkëmbimin dhe kalimin e tyre te privatët. Deputeti i Partisë Socialiste, Eduard Shalsi, nismëtar i këtij projektligji, ftoi opozitën që ta votojë dhe theksoi se po krijohet një panik i pajustifikuar rreth kësaj nisme.

Sipas Shalsit, ligjërimi i shkëmbimit të pronave vjen si rezultat i situatave të ndodhura gjatë viteve, ku procedurat e shkëmbimit janë realizuar përmes procedurave të posaçme, pasi ligji aktual nuk e parashikonte këtë mundësi. Ai shpjegoi se qëllimi i këtij projektligji është harmonizimi i sektorit që merret me pronat dhe zgjidhja e ngërçit të privatizimit që ka qenë i gjatë dhe i pazgjidhur.

“Harmonzion në një pikë të vetme sektorin që merret me pronat. Procesi i privatizimit synon që pronat publike, të cilat nuk i shërbejnë më interesave publike, të privatizohen. Privatizimi tradicional njihet si një veprim juridik përmes kontratës së shitjes. Megjithatë, gjatë viteve, ngërçi i procesit të privatizimit ka qenë i gjatë dhe i pazgjidhur,” tha Shalsi.

Ai theksoi se ky projektligj nuk ka ardhur nga hiçi, por ka lindur si nevojë për shkak të rasteve të ndodhura dhe korrespondencave të vazhdueshme me bashkitë. Shalsi shtoi se projektligji është rezultat i konsultimeve të shumta me punonjës që kanë një memorie institucionale dhe pritet të sjellë zgjidhje për problemet e mbartura nga e kaluara.

Shalsi iu drejtua opozitës duke i ftuar të mbështesin këtë nismë, dhe e quajti të pajustifikuar panikun dhe alarmin që po krijohet rreth këtij projektligji. Ai përmendi se ndryshimi i propozuar është një element i domosdoshëm për objektet që kanë humbur dobinë e tyre publike dhe që duhet të privatizohen ose të shkëmbehen për të maksimizuar vlerën e tyre kontabël.

“Nga ky moment ne këto kohë kemi folur për një proces shumë interesant, pra monitorimi i ligjeve mbasi miratohet. Hajde ta bëjmë pjesë këtë ndryshim të cilat do t’i monitorojmë. Mund të provojmë, le ta fillojmë e ta vendosim në kalendarin e kuvendit që të ndjekim çfarë synon ky akt. Kjo është lehtësisht e provueshme. Këtë ndryshim ligjor e kemi marrë përsipër me ju ose pa ju,” tha Shalsi.

Ai përfundoi duke theksuar se projektligji synon të zgjidhë problemet e mbartura përmes një procesi të rregullt dhe transparent dhe se nuk ka asnjë arsye për të mos e mbështetur këtë nismë që hap një perspektivë të re për menaxhimin e pronave shtetërore.