Prej gjashtë ditësh, vijon intensivisht puna për mbylljen e çarjeve në argjinaturën e Çukës, të shkaktuara nga prurjet e shumta të lumit Bistrica. Forcat operacionale të Bashkisë Sarandë dhe emergjencat civile po punojnë në terren me mjete të rënda dhe materiale mbrojtëse, për të garantuar sigurinë e zonës bujqësore dhe për të shmangur përmbytje të tjera.

Dëmet për fermerët janë të mëdha dhe në rritje. Drejtuesi i grupit operacional të emergjencave në Bashkinë Sarandë, Jolio Dine, konfirmon se shifrat paraprake janë shqetësuese.

“Sipas përllogaritjeve të deritanishme, janë mbytur rreth 700 krerë bagëti të imta, afro 2 mijë shpendë, si dhe disa kosheres me bletë. Dëme të konsiderueshme janë regjistruar edhe në magazinat e misrit, i cili sapo ishte korrur”, u shpreh Dine.

Për të lehtësuar situatën, emergjencat civile kanë shpërndarë deri tani 8 tonë ushqim për bagëtitë, ndërsa vazhdon procesi i grumbullimit të të dhënave.

“Çdo person i dëmtuar duhet të paraqitet në Bashkinë Sarandë për raportimin e dëmeve. Vetëm pasi të kemi evidencimin e plotë, do të vendosim për hapat e mëtejshëm”, shtoi Dine.

Megjithatë, fermerët ende nuk kanë një afat të saktë se kur do të nisë procesi i dëmshpërblimit. Sipas autoriteteve, gjithçka do të varet nga vlerësimi përfundimtar dhe vendimmarrja institucionale.

Ndërkohë, punimet për rikonstruksionin e argjinaturës vijojnë me qëllim mbrojtjen e tokave bujqësore në Çukë dhe fshatrat përreth, duke shmangur rrezikun e një tjetër përmbytjeje.