Vlorë – Kryetari i Bashkisë së Vlorës, Ermal Dredha, ka dhënë dorëheqjen nga detyra me një letër publike të ndjerë, drejtuar qytetarëve vlonjatë dhe Kryeministrit.

Në reagimin e tij, Dredha e konsideron dorëheqjen si një akt reflektimi dhe përgjegjësie, ndërsa shprehet se ky vendim vjen për arsye familjare, personale, politike dhe administrative.

“Kam vendosur të paraqes dorëheqjen time nga detyra si Kryetar i Bashkisë së Vlorës.
Pavarësisht sfidave dhe vështirësive, kam jetuar çdo ditë të këtij detyrimi me përkushtim dhe ndershmëri. Megjithatë, besoj se në një moment të caktuar është e rëndësishme të dish të largohesh me dinjitet, për t’i hapur rrugë energjive dhe ideve të reja. Dorëheqja ime vjen si një akt reflektimi dhe përgjegjësie,” – shkruan ai.

Dredha thekson se dorëheqja nuk nënkupton largim nga përgjegjësia publike, por një hap për të krijuar hapësirë për vizione të reja.

“Si djalë i këtij qyteti kaq të dashur, do të shërbej në çdo formë, njësoj siç kam bërë çdo ditë të karrierës sime diplomatike. E vetmja gjë që mbetet e pandryshuar është që Vlora do të jetë gjithnjë e para në zemrën time,” – përfundon ai.

Dredha mori detyrën pas largimit të ish-kryebashkiakut Dritan Leli. Ende nuk dihet se kush do të drejtojë bashkinë pas dorëheqjes së tij, ndërsa pritet reagimi i mazhorancës për emrin e pasardhësit.