Prej disa ditësh, ekipet e kërkim-shpëtimit vijojnë betejën me kohën dhe terrenin e vështirë për të gjetur 29-vjeçarin Ardit Beshiri, i cili mbeti i zënë nën dhe pas një rrëshqitjeje masive gjatë punës me një ekskavator në një fabrikë përpunimi kromi, në zonën e njohur si “Qafa e Burrelit”.

Përpjekjet për gjetjen e tij nuk janë ndalur që nga dita e incidentit. Në ndihmë të autoriteteve shqiptare janë bashkuar edhe Forcat e Sigurisë së Kosovës, të cilat kanë mbërritur mëngjesin e së mërkurës pranë vendit ku vijojnë kërkimet intensive.

Në vendngjarje janë gjetur disa shenja rrobash, që dyshohet t’i përkasin Arditit, si dhe mbetje të mjetit ekskavator, që konfirmojnë se ai ka qenë duke punuar në momentin e fatkeqësisë.

Kërkimet po realizohen me mjete të rënda, por edhe me aparatura të specializuara për zbulimin e trupave nën dhe, ndërsa ushtria shqiptare është angazhuar me mjete me krah për të ndihmuar heqjen e shtresave të tokës në mënyrë sa më të kujdesshme.

Në zonën ku janë gjetur rrobat është vendosur një perimetër sigurie, ndërsa ekipet po punojnë me përqendrim të lartë për të shmangur rrezikun e rrëshqitjeve të mëtejshme apo dëmtimin e mundshëm të trupit të 29-vjeçarit, në rast se ai gjendet.

Tragjedia që ka tronditur familjen Beshiri dhe gjithë komunitetin lokal ka rikthyer në vëmendje mungesën e standardeve të sigurisë në miniera dhe zonat industriale, ndërkohë që autoritetet ende nuk kanë dhënë një version zyrtar për shkaqet e rrëshqitjes.

Familjarët e Arditit presin me ankth çdo informacion, ndërsa në rrjetet sociale është shpërndarë gjerësisht apeli i tyre për të mos ndalur kërkimet deri në zbulimin e fatit të të riut.