Pas 23 ditësh grevë urie, shqiptari Pano Ruci ka vendosur të ndalë protestën e tij në Sheshin Sintagma të Athinës, pasi autoritetet greke pranuan kërkesat për zhvarrosjen dhe ekzaminimet e reja të trupit të të birit, Denis Ruci, viktimë e tragjedisë hekurudhore në Tempi.

Ruci kishte kërkuar transparencë të plotë në procesin e analizave toksikologjike dhe mjeko-ligjore, duke theksuar se “lufta” e tij ishte për të nxjerrë të vërtetën në dritë.
“Sot drita mposhti errësirën,” deklaroi ai mbrëmjen e së martës, duke falënderuar të gjithë ata që e mbështetën në këtë betejë të vështirë.

Në një prononcim të mëparshëm, Ruci u shpreh se “i ka përjetuar këto ditë me shumë dhimbje dhe lodhje”, por se “mbështetja e njerëzve i ka dhënë forcë të shpresojë”.

Ndërkohë, avokatja e tij, Zoi Konstantopulu, e cilësoi fitoren morale të Rucit si një moment drite pas javësh të errëta heshtjeje institucionale.
“Me forcën e shpirtit të tij dhe të drejtën në anën e tij, Pano Ruci mposhti mekanizmat që donin të groposnin të vërtetën. Dosja me 3.000 faqe, që dokumenton neglizhencat e institucioneve, po rikthehet në qarkullim. Kjo është dëshmia se këmbëngulja dhe guximi i tij nuk ishin të kota,” tha Konstantopulu.

Me këtë zhvillim, dosja e tragjedisë së Tempi pritet të rihapet për ekzaminime të reja, ndërsa Ruci ka deklaruar se do të vazhdojë të ndjekë procesin deri në fund, “derisa drejtësia të flasë plotësisht.”