Një sulm me dronë nga forcat ruse ka goditur një ndërtesë banimi në qytetin jugor të Odesës në Ukrainë, duke plagosur të paktën tre persona, mes tyre edhe një fëmijë. Ngjarja ndodhi në një zonë të populluar dhe ka shkaktuar panik mes banorëve, ndërsa shumë apartamente janë dëmtuar rëndë.

Kryetari i bashkisë së Odesës, Hennadiy Trukhaniv, deklaroi në rrjetet sociale se banorët janë në gjendje shoku pas sulmit, ndërsa shërbimet e emergjencës kanë publikuar pamje të zjarrfikësve që luftojnë me flakët në ndërtesat civile.

Forca Ajrore e Ukrainës raportoi se gjatë natës janë ndërmarrë dhjetëra sulme me dronë të tipit “Shahed” nga Rusia në të gjithë vendin, duke përfshirë lindjen, veriun, jugun dhe qendrën e Ukrainës. Nga 54 dronë, 38 u rrëzuan nga mbrojtja ajrore ukrainase.

Këto sulme ndodhin në një moment kur po intensifikohen përpjekjet diplomatike për arritjen e një armëpushimi. Presidenti rus Vladimir Putin pranoi një ditë më parë se një ndër caqet e sulmuara nga ushtria e tij në qytetin Sumi ishte një ndërtesë civile, duke pretenduar se aty ndodheshin forca ushtarake ukrainase. Sulmi në fjalë shkaktoi vdekjen e 35 personave.

Ndërkohë, në Kiev janë raportuar dëme të tjera materiale pas një vale të re sulmesh gjatë natës së 22 prillit, ku u dëmtuan gjashtë shtëpi, katër automjete dhe disa ndërtesa ndihmëse.

Ministri i Jashtëm francez, Jean-Noël Barrot, e quajti “armëpushimin e Pashkëve” të shpallur nga Rusia një “operacion marketingu”, i cili synon të ndikojë opinionin e presidentit amerikan Donald Trump, i cili ka shprehur pakënaqësi për vazhdimin e luftës.

Në këtë klimë tensioni dhe diplomacie të brishtë, një takim i nivelit të lartë do të mbahet në Londër më 23 prill, ku do të marrin pjesë Britania, Franca, Gjermania, Ukraina dhe Shtetet e Bashkuara. Kjo pason një mbledhje të mëparshme në Paris më 18 prill, e para në këtë format që prej marrjes së detyrës nga Trump.

Putin gjithashtu ka shprehur për herë të parë gatishmërinë për bisedime të drejtpërdrejta me presidentin ukrainas Volodymyr Zelensky, një qëndrim që e ka refuzuar deri më tani. Megjithatë, analistët në Kiev shprehen skeptikë, duke e quajtur këtë një përpjekje cinike për të manipuluar perceptimin ndërkombëtar dhe për ta paraqitur Rusinë si “forcë paqeruajtëse”.