Fitim Dumani, në pjesën e dytë të intervistës për emisionin Ma Shqip me Flamur Vezaj, hedh akuza të rënda ndaj politikanëve dhe emrave të botës së krimit, duke vënë në dyshim veprimet e SPAK.

“SPAK e tërhoqi urdhrin e arrestit ndaj Taulant Ballës, i cili – sipas Dumanit – e mbron Suel Çelën. Derisa Balla të jetë në politikë, Çela nuk arrestohet, sepse lëviz i lirë në Elbasan,” deklaroi ai.

Dumani tha se kur doli urdhër-arresti për Suel Çelën, u lëshua edhe për Ballën, por “çuditërisht ai u tërhoq”. Ai përmendi edhe prova filmike të siguruara nga dy qytetare në Elbasan, që e kishin parë Çelën duke lëvizur i lirë, të cilat – sipas tij – i disponon edhe SPAK, por nuk ka ndërmarrë veprime.

Një tjetër episod i rëndë që Dumani tregoi lidhet me përpjekjet e Emiljano Shullazit për ta blerë heshtjen e vëllait të tij, Nuredinit:
“Shullazi ofronte 700 mijë euro që Nuredini të tërhiqte dëshminë për Suel Çelën dhe Gent Sharrën. 500 mijë do i jepte Çela, 200 mijë Sharra. Por nuk u bë takimi, sepse ne kishim njoftuar SPAK,” u shpreh ai.

Akuza të forta Dumani hodhi edhe ndaj ish-presidentit Ilir Meta, duke rrëfyer një episod të vitit 2017, ku sipas tij, Meta ishte prezent në një darkë festive të organizuar nga Xhevdet Troplini, i njohur si “Poja”.
“Meta u detyrua të ngrihej e të kërcejë në atë mbrëmje,” tha ai, duke lënë të kuptohet për lidhje të ngushta mes politikës dhe botës së krimit.

Gjithashtu, ai tronditi me deklaratën se urdhri për vrasjen e Aleksandër Ndokës nuk ka lidhje me Durim Bamin:
“Vrasjen e Ndokës e ka urdhëruar një ish-zyrtar i lartë i shtetit, që sot ndodhet në burg,” tha Dumani.

Në intervistë, ai përmendi edhe përfshirjen e Pojës në mbylljen e dosjes së tij për blerje votash për LSI në vitin 2017, si dhe rolin e Fatmir Troplinit në disa ngjarje kriminale.

Ai foli hapur edhe për lidhjet e të vëllait me grupe të fuqishme kriminale, duke përmendur Bajrat e Shkodrës, Vis Maitinajn, Eldi Dizdarin, vëllezërit Çopja, Erjon Alibeajn dhe Talo Çelën.

Në fund, Dumani hodhi hije dyshimi mbi SPAK, duke ngritur pyetje përse është larguar nga programi i mbrojtjes Klevis Alla, i përfshirë në vrasjen e katërfishtë në Durrës.

“Edhe sot ka oferta nga grupe kriminale që vëllai im të heshtë. Por e vërteta nuk blihet me para,” përfundoi Dumani.