Durrësi është përballur paraditen e së enjtes me reshje të dendura shiu, që kanë krijuar probleme serioze në qarkullimin e automjeteve dhe këmbësorëve. Shumë kryqëzime rrugësh janë përmbytur, ndërsa disa automjete kanë mbetur të bllokuara nëpër rrugë.

Një nga pikat më kritike mbetet nënkalimi pranë “Velierës” në lagjen nr. 1, ku niveli i lartë i ujit ka detyruar policinë të ndalojë qarkullimin në të dy drejtimet. Qytetarët raportojnë se situata ka krijuar vonesa të konsiderueshme dhe vështirësi në qarkullim, ndërsa ekipet e emergjencës punojnë për pastrimin dhe largimin e ujit.

Policia bën apel për kujdes maksimal gjatë lëvizjes, ndërsa autoritetet lokale paralajmërojnë për vijim të reshjeve dhe rritje të mundshme të nivelit të ujit në disa akse rrugore.

Rruga drejt një qarkullimi normal pritet të jetë e vështirë deri në përmirësimin e kushteve meteorologjike.