Vlorë – Një ngjarje e rëndë ka tronditur qytetin e Vlorës këtë të hënë, ku një vajzë 17-vjeçare ka mbërritur në gjendje kritike për jetën në spital, pasi dyshohet se është vetëplagosur me armë zjarri në banesën e saj në lagjen “Kushtrimi”.

Sipas burimeve zyrtare nga policia, rreth orës 11:40, e mitura është transportuar me urgjencë në Spitalin Rajonal të Vlorës, ku ka mbërritur fillimisht në gjendje të vetëdijshme, por më pas ka humbur ndjenjat dhe ka rënë në koma.

Mjekët konfirmojnë se vajza, e identifikuar si Hyerta Hysaj, ka dy dëmtime të rënda në kokë: një pranë syrit, në afërsi të temthit, dhe një tjetër në pjesën e sipërme të kokës, ku mendohet se ka dalë plumbi. Ajo aktualisht është e intubuar dhe po mbahet në jetë falë faktit që gjaku ka dalë jashtë kafkës, duke shmangur deri tani një hemorragji të brendshme fatale.

Mjekët kanë bërë të ditur se për shkak të gjendjes së rënduar, pritet që e mitura të dërgohet me urgjencë drejt një spitali më të specializuar në Tiranë për trajtim të mëtejshëm.

Ndërkohë, grupi hetimor ndodhet në vendngjarje dhe ka nisur punën për zbardhjen e plotë të rrethanave të këtij rasti tronditës. Deri më tani, pista kryesore e hetimit është ajo e vetëplagosjes, por policia nuk përjashton asnjë tjetër mundësi.