Kryeministri Edi Rama mori pjesë dje në edicionin e 9-të të Future Investment Initiative në Riad, një nga forumet më të rëndësishme globale për inovacion, teknologji dhe investime të qëndrueshme, ku u takuan liderë botërorë dhe sipërmarrës për të diskutuar mbi të ardhmen e ekonomisë globale.

Gjatë panelit, Rama vlerësoi praninë e Gianni Infantino, president i FIFA-s, të cilin e quajti përfaqësues të lëvizjes më të madhe njerëzore dhe avokat për Kupën e Botës 2034. “Perandori i futbollit është këtu dhe është një prej shenjave më domethënëse që tregon çfarë po ndodh në këtë vend,” tha Rama.

Kryeministri theksoi rëndësinë e bukurisë dhe vizionit për transformimin e hapësirës dhe njerëzve. “Ka vende të mrekullueshme që mund të jenë të varfra, por nuk ka vende të shëmtuara që të jenë të begata dhe të pasura. Bukuria dhe hapësira ku jetojmë lidhen drejtpërdrejt me begatinë dhe zhvillimin e njerëzve,” shtoi ai.

Ai përshkroi transformimin e Arabisë Saudite si një shembull frymëzues: “Synimi për ta kthyer këtë shkretëtirë në një ‘Firence 2.0’ tregon se gjithçka është e mundur. Ajo që po përjetojmë sot në Perëndim është inercia, por këtu imagjinata ushqehet nga inovacioni dhe dëshira për të bërë kapërcime të mëdha.”

Rama foli edhe për energjinë e ndryshme që përjetoi sapo mbërriti në Riad dhe ndikimin e hapësirës së bukur urbane: “Vetëm duke parë skulpturat dhe gjelbërimin e rrugëve, e kupton ndryshimin. Imagjinoni një mëngjes ku njerëzit dalin nga shtëpia pa u shqetësuar për ambientin – kjo është fuqia e transformimit.”

Ai përfundoi duke theksuar mësimet që mund të nxirren nga shembuj si Infantino dhe vendet e Gjirit: “Ka ardhur koha të jemi të përulur dhe të mësojmë nga ata që kombinon forcat tradicionale me energjitë e reja. Ajo që funksionon në Europë mund të aplikohet edhe në Katar, Arabinë Saudite, Marok dhe SHBA.”